"Nu rinner solen opp"

“Nu rinner solen opp”

Søndag 26. april har Ørstakoret konsert i Ørsta kyrkje.
Koret har øvd inn eit program der all musikken er arrangert av Terje Aarset, medlem av koret gjennom mange år.
Han er professor emeritus i norsk språk frå Høgskulen i Volda. Terje har også, saman med kollegaer i Bergen og Oslo, lagt ned eit stort arbeid for å gjere Ivar Aasen sine skrifter tilgjengelege, m.a. manuskript som ikkje har vore publiserte tidlegare.

Men han har også ein givnad for musikk, og i det mediet har han lyft fram eit stort tal folketonar og mindre kjende melodiar gjennom sine mange fine arrangement for kor, song og piano og anna. Fjorten av korarrangementa vil ein få høyre på konserten.
Då Ørsta kyrkje feira 125 år i 1989, vart det halde to konsertar med utgangspunkt i folketonar frå Ørsta, dei aller fleste i ny drakt ved ulike arrangørar. Til desse konsertane arrangerte Aarset folketonen «Nu solen går ned» etter Karen Sandvik, og dette vart det fyrste av over 200 arrangement fram til i dag. Denne songen kjem som avslutning på konserten, som høveleg nok opnar med «Nu rinner solen opp», etter ein folketone frå Hareid.
Mellom desse folketonane kjem det så eit rikt utval av tonar med ulikt opphav, alle i Aarset si harmoniske innpakning.
Mellom dei tre koravdelingane vert det allsong: «Sumarkvelden» av Aasen, til tone av Roar Goksøyr, og «Til Telemork» av Sivle, med ein tone av Rasofiel Rise.
Utanom folketonane er desse komponistane representerte i programmet: Ragnar Bull, Arild Torvund Olsen, Kristen Chr. Kopseng, Roar Goksøyr, Simon Vatne, Edvin Helgheim, Rasofiel Rise og Harald Grimstad, alle tonane harmoniserte av Terje Aarset.

Dette er fyrste gongen arrangementa hans fyller ein heil konsert. Ørstakoret har gjennom mange år hatt glede av hans skaparkraft, og det er difor svært høveleg at nettopp dei byr inn til ein eigen Terje Aarset-konsert i Ørsta kyrkje.
Roar G. Lillebø dirigerer Ørstakoret.

Og so, litt til, 21.04.26:

Tekst og tone

“Den teksta der har vore heldig,”
var det ein kar som sa på siste korøving.

Ørstakoret øver fram til konserten “Nu rinner solen opp”, komande søndag klokka 1800’.
Utsegna ovanfor handlar om forholdet mellom tekst og tone. Han sikta til dei høva der ei ekstra god tekst har vorte fanga opp av ein dyktig komponist som har gitt teksta ein god melodi, og attpåtil har ein gåverik arrangør gitt melodien eit makelaust arrangement.
Eit arrangement som gjer at melodien vert utvida med klangar og harmoniar som maktar å understøtte og forsterke innhaldet og nerven i teksta.
Terje Aarset meistrar å lage slike arrangement.
I denne konserten synest vi at det er ekstra mange songar som er særprega av slike gode relasjonar mellom tekst og tone. Her er både ulike refleksjonar frå livet og vare kjensler.
Tekstforfattarane strekkjer seg i tid frå Thomas Kingo og fram til våre dagar.
Det er mange eksempel, men vi kan trekkje fram t.d. “Himmelen blåner” av Einar Skjæraasen, ein uventa “Salme” frå Jakob Sande, “Ventetid” av Arild Torvund Olsen og songen “Kveld”, som er bygd på eit dikt av Aasta Vartdal.

De er velkomne til å oppleve “Nu rinner solen opp” i lag med oss!
Ørstakoret